ഒന്നാം ദിനം :
പുതു മണം ഉള്ളവള്‍ പുതു മണവാട്ടി.
പൂമണം പുടവ മണം പൂമേനി മണം
ഉടലാകെ മണമുള്ളോള്‍
ഉടയാത്ത മണമുള്ളോള്‍
.
രണ്ടാം ദിനം :
തേന്‍ മണമെന്നു രുചിച്ചു പറഞ്ഞത്
കാറ്റോ കരളോ.? പോന്നോ പൊരുളോ ?
മൂന്നാം ദിനം :
പാറ്റി എടുത്തത് രാവോ പകലോ?
ഊറ്റി എടുത്തത് തെറ്റോ വറ്റോ?
നാലാം ദിനം :
മുറ്റം ചുറ്റി ചുറ്റി കൂനി കുറുകിയ നിഴലിന്‍
ചുവടടയാളം തേടി പുതു മണ്ണില്‍ കണ്ണ് തളര്‍ന്ന നിലാവ്.
അഞ്ചാം ദിനം :
മുടിയഴകില്‍ ചൂടിയ ഗന്ധം വാടി
മുടിയിഴയില്‍ ഇഴയും ചുരുള്‍പ്പുക
ഫണമാടും കെട്ട മണം
കെട്ടിയ കെട്ടഴിയും പഴമണം
ആറാം ദിനം:
പൊട്ടിച്ചിരിയുടെ സ്വരതന്തുക്കള്‍
പണയം വെച്ചിട്ടവധി മുടക്കി
മടങ്ങിയ പാതി.
ഏഴാം ദിനം :
ക്ലാവ് പിടിചോരെച്ചില്‍ കിണ്ണം
കൊത്തിപ്പിളരും കൊക്കിന്‍ താഴെ
സുമംഗലവാരം ചാരം
No comments:
Post a Comment